講過微創、講過血管手術，今次講下外科其中一個最新嘅技術。
前幾年（其實都唔知幾年），無記電視有一個特輯叫《守護生命的故事》，有一集介紹左一個叫達文西外科手術系統（Da Vinci Surgical System）嘅技術，包括左一部好似一部街機嘅控制台，同埋用呢部機控制住嘅一堆機械臂。手術期間，呢樣機械臂會插入病人身體裏面，幾米外就會坐住一個埋首打緊街機嘅醫生，遙距做手術。
對醫學生黎講，手術當然無你份，街機更加唔會比你掂，所以只可以做嘅仍然係企係到睇住個螢幕、望住醫生打機。正如大家睇戲，睇 2D 定 3D 悉隨專便，比得起錢就可以睇 IMAX；達文西系統輸出嘅畫面，係可以 3D 架！我重覆，係 3D 架！
入到手術室，每人會獲發一副立體眼鏡，戴住佢，就可以食住花生（手術室嚴禁飲食）睇醫生打機。小弟有幸睇嘅一次，係要將病人半邊肝移除，而我地就好立體咁望住機械夾伸前縮後、流血會以為就黎滴落幅牆到、將病肝裝起個一下仲會見到成個肝飛埋黎，好刺激。
所以嘛，係潮流尖端睇外科手術，好似…好似睇左一套六個鐘頭長嘅阿凡達。
===我是分隔線===
有人問，咁達文西系統（下稱街機）同埋普通微創其實有咩分別？
最普通嘅傳統微創手術所用嘅機械臂，其實同一條鐵棍差不多，而頂部位置就會插多樣儀器。情況就好似大家插住幾條棍入一個裝左幾塊積木嘅密封木箱，要用鏡頭影像將積木拆開疊起。
街機都係同樣插住好多棍，但係可移動嘅方向就會多好多。控制台部份係會有幾隻戒指狀嘅圈圈套住醫生嘅手指，而電腦會分析圈圈嘅動作，減少左手震等等嘅資訊，再用機械臂係病人體內做出相同動作。而且，街機當然鏡頭又大又靚，仲有立體成像添。因此，街機基本上，郁又靈活、準繩度亦都會更高，是為手術技術一大發明（當然價錢都貴好多啦...）。
Search